Ek Din Achanak Part 50
Wo kisi tarah se ghar pahunchi to andar ka najara dekhte hi chaunk padi. Saare doston ki mandali wahan pehle se maujood thi. In sab tension mein wo apna birthday bhi bhool gayi thi. Aaj uska birthday tha aur sab dost uska birthday celebrate karne aaye the.
Aaj wo bahut khus thi kyunki aaj use apne birthday par sabse achha tohfa apne sasur se mila tha jab usne Jay ki shaadi Sonali se karane ki baat ki. Sonali ki aankhon mein khushi ke aansu beh chale. Aaj tak use lagta tha ki duniya mein Jay ke siwa uska koi nahin hai lekin baaki doston ka pyaar aur apnapan dekh kar uska dil bhar aaya.
Itne saare bhai-behan use mil gaye the. Aaj wo bahut khus thi. Diya aur Riya use andar le gayi aur birthday party ke liye tayyar karne lag gayi. Thodi der baad jab Sonali bahar aayi to sab use dekhte reh gaye. Kal tak jiske sharer par widhwa wali safed saari viraajmaan thi aaj uski jagah ek hare rang ki makhmali saari thi.
Kal tak jo chehra kisi bhi tarah ke shringaar se vanchit tha aaj us par shringaar ki alag hi chata bikhar rahi thi. Kal tak jo aankhen gham aur udasi se bhojhal thi aaj usme jindagi jeene ka maksad aur uski anubhuti saaf dikhayi deti thi. Kal tak jo chehra dukh aur dard se bahra huya tha aaj us chehre se khushi aur hansi hatne ka naam hi nahin le rahi thi.
Jay ke to hosh hi ud gaye the Sonali ko dekh kar. Itni khubsurat to wo use school ke dino mein bhi nahin lagi thi. Halanki Jawed ne use bataya tha ki Ravi Sikander se baat karke aaya hai ki dono ki shaadi kara di jaaye. Kya pata Sikander maan jaye.
Ek taraf to Jay ka dil khushi ke mare balliyan uchal raha tha ki ab uski jindagi mein Sonali phir se aane wali hai to wahin doosri taraf ek anjaana dar bhi samaya huya tha ki kahin Sikander ne mana kar diya to Sonali uski baat nahin talegi. Kya hoga aur uski jindagi kya khel dikhayegi kise pata ?
Idhar Sonali aur Jay apne sunhere bhavisya ki kalpana mein khoye huye the to doosri taraf Ravi is firak mein tha ki kab use mauka mile aur wo Monika ko maja chakhaye. Aur kismat us par itni meharbaan thi ki use iske liye jyada intezaar bhi nahin karna pada.
College mein photography contest ki ghosna ki gayi jiske winner ko ek saal ki scholarship aur world ke best photographers ke saath kaam karne ka mauka milega. Monika ye sunkar bahut khus huyi aur usne turant hi ye mauka accept kar liya.
Halanki use jarurat nahin thi kisi bhi tarah ki scholarship ki lekin jeetne ke baad aapki dhaak to jamti hi hai na. Bas yahi sab soch kar aur apne hobby ko dhyaan mein rakh kar usne apni khinchi huyi kuch photos ke saath application file dal di.
Ravi ko bhi jab ye pata chala to uske dimaag mein ek nayi khurafat ne janm liya. Usne bhi kuch photos collect ki aur apni application dal di. Aur luckily Monika aur Ravi dono ki hi files manjoor ho gayi. Ab Ravi ko to jyada shauk nahin tha photography ka jo wo ye contest jeetta use to bas kisi bhi tarah Monika ko neecha dikhana tha.
Monika ne ji tod mehnat ki. Poora jungle chaan maara. Alag alag tarah ke ped-podhe, chidiya, jaanwar, ya jo bhi kuch ajeebo gareeb dekhti uski turant photo khinch leti. Iske liye wo hamesha apne gale mein camera latkaye ghumti rehti. Use bas ek junoon tha ki kaise bhi karke is contest ko jeete.
Sab uski saheliyan uska majak udati lekin use kisi ki parwah nahin thi. Ladke waise hi us par fida the to wo kuch kehte hi nahin the balki wo to kai baar uska camera uthaye uthaye uske saath ghumte rehte the.
Ek hafte mein report pesh karni thi aur usne kaam sirf 6 din mein hi poora kar liya. Iske baad wo apni reel dhulwane ke liye ek photo studio mein le gayi jisne use shaam ko aane ke liye kaha kyunki ye kaam urgent tha to usi din dene ke liye Monika use muh maange paise de rahi thi.
Lekin shaam ko jab wo waapas aayi to studio wale ne photo dene mein apni asamartha jatayi aur use agle din dopahar ko aane ke liye kaha kyunki aadha kaam ho gaya tha isliye chahte huye bhi Monika wo reel wapas nahin le paayi aur use dopahar ko jaroor dene ki sakht hidayat dete huye wapas aa gayi.
Agle din dopahar ko usne us studio se photo collect ki aur turant ghar pahunch kar unhen file mein laga kar report tayyar karne lagi. Tayyar karte karte kab raat ho gayi use pata bhi nahin chala. Jab report khatam huyi to usne khana khaya aur jaldi sone ke liye chali gayi.
Last date aaj hi ki thi submit ki jise usne ganwa diya tha lekin wo kar bhi kya sakti thi. Subah jaldi se wo uthi aur turant college pahunchi. Wahan usne dekha kai students ne apni file jama kar di hai to kai haath mein liye sir ke aane ka intezaar kar rahe hain. Use is baat ki tasalli ho gayi ki kam se kam wo akeli to nahin jo late file submit kar rahi hai.
Thodi der baad sir aaye aur thoda sa students ko jhidka late submission ke liye lekin fir unhone accept kar li sabki file aur ek ek karke sabki files bariki se check karne lage. Kayi students ko unhone shabasi di to kayi students ko unhone unki galti se avagat karaya taaki wo aage se dhyaan rakhe.
Ravi ki file aane par sir chaunk gaye. Monika ko laga jaroor isne koi aaltu faaltu photos khinche honge jinhe dekhkar wo chaunk gaye. Wo to man hi man khus ho rahi thi ki sir ab Ravi ko fail kar denge aur wo uska majak udayegi.
Lekin uski ichha dhari ki dhari reh gayi jab teacher ne bolna shuru kiya.
“Ravi its just unbelievable. Ye sab tumne photos khinchi. Mujhe nahin pata tha ki itne behtarin photos bhi khinch sakte ho. Pehle to tumhara interest kabhi nahin dikha photography mein. Tum ek chupe rustam saabit huye ho hum sabke liye. Kitni sunder pics hain."
"Ye tumne kab aur kahan khinchi. Jara batao humein.”
“Sir, maine to ye file kal hi bana di thi. Dekhiye is packet par us photo studio wale ne date aur time bhi likh diya hai. (Ye Ravi ne jaan bhujkar us photo studio wale se likhwaya tha aur soch samajh kar sir ko dikhaya tha)”
“Beta ye time aur date dikhane ki kya jarurat hai. Humein vishwaas hai tum par”
“Sir aapki baat sahi hai lekin kya hai jahan maine apni reel dhulwayi thi wahan kayi aur students ne bhi apni reel dhulwane ke liye di thi. To kahin aisa na ho ki unme se koi meri photos ki copy kar le aur apne naam se pesh kar de.”
“Beta baat to tumhari sahi hai. Achha ye batao tum kahan kahan gaye aur kaise ye photos khinchi.”
“Sir, main kayi jagah gaya. Poora jungle chaan maara aur chun chun ke photos ikattha kiye. Kitna baar gira, chot lagi, bhookh pyaas sab tyaag diya lekin sirf apne kaam ko hi ahmiyat di”
Ravi taperecorder ki tarah bajta chala jaa raha tha aur Monika ka mooh hairat se khula ka khula reh gaya tha. Ab to wo yeh soch rahi thi ki uski photos achhi bhi hai ya nahin. Jitni tareef sir ne Ravi ki ki hai to yakeenan uski photos mein kuch to baat hogi.
Kab Ravi ne bolna band kar diya aur kab doosre students aate gaye jaate gaye Monika ko pata bhi nahin chala. Wo to bas inhi khyalon mein khoyi huyi thi ki pata nahin uski report sir ko pasand aayegi ya nahin. Mehnat to usne bahut ki thi lekin kya wo aaj Ravi ke saamne haar jayegi? Kya wo fir se uska majak banayega?
Kya hoga jab wo haara huya chehra lekar apne bhai ke paas jayegi? Jo bhai uski aankhon mein ek aansu nahin dekh sakta uske dil par kya beetegi jab wo apni behan ko haara huya mehsoos karega?
Uska dhyaan tab toota jab uske kaanon mein sir ke cheekne ki awaaz aayi MONIKA….
Wo ek dum ghabra gayi aur jaldi jaldi mein uske haath se uski file bhi choot gayi jise dekhkar saari class hans padi. Usne kisi tarah apne aap ko sambhala aur apni file utha kar sir ke paas le gayi. Sir ne usse poocha “Tumhari tabiyat to theek hai na. Tumhara aaj class mein dhyaan nahin hai”
“Sorry Sir, meri tabiyat theek hai bas thoda sir dard hai. Is file ko banane ke chakkar mein theek se rest bhi nahin ho paya hai ab tak.”
“Chalo koi baat nahin. File dikha kar jama kar do aur ghar chali jao rest ke liye”
Monika ki file kholne ke baad sir ek baar fir chaunk gaye. Monika andar hi andar bahut khus ho gayi ki lagta hai sir ko meri file bahut pasand aayi hai. Mujhe pata tha kyunki maine mehnat bhi to bahut ki thi. Ab mujhe bhi sabke saamne shabashi milegi. Ravi to bechara buri tarah chid jayega. Uska chida huya chehra dekhkar bada maja aayega.
Lekin uski khushi kuch pal ke liye hi thi jab tak sir ki kadakti huyi awaaz uske kaanon mein nahin padi.
“Tum mujhe kya bewkoof samajhti ho. Doosron ki mehnat ko apni bata kar naam kamana chahti ho. Maine tumhe ek hosiyaar ladki samjha tha lekin mujhe pata nahin tha ki tum itni hosiyaar ban jaogi ki mujhe hi bewkoof banane chal dogi”
Monika ki hairat ki koi seema nahin thi. Uski samajh mein nahin aa raha tha ki sir kya keh rahe hain. Uske muh se bas itni awaaz nikli “Sir maine kya kiya hai”
“Kya kiya hai. Doosron ki files ki copy kar ke apne naam se pesh kar rahi ho aur poochti ho maine kya kiya hai. Files banane mein kitni mehnat lagi hogi kisi bachhe ki tumhe iska jara bhi andaaza hai."
"Bas chal diye chori karke paas hone. Tumne mera vishwaas tod diya hai. Maine specially tumhare naam ki sifarish ki thi principal sir ke saamne lekin ab kis mooh se unke paas jaunga.”
“Socho tumhare dil par kya beetti jab koi tumhari mehnat ko isi tarah bekar karke apne naam kar le. Kaisa lagega us samay tumhe. Ab bolo bolti kyun nahin. Kyun kiya tumne aisa. Jab tumhare bas ki baat nahin thi to participate hi nahin karna chahiye tha. Kam se kam main to principal sir ke saamne jaleel hone se bach jaata.”
Monika ki aankhon se aansu beh rahe the. Badi mushkil se usne poocha “Maine kiski file copy ki hai.”
“Ravi ki. Uski files ki bhi same photos hain jo tumhari files mein hai. Ek do same hoti to main soch bhi leta ki shayad tum dono ne saath saath photos khinche honge lekin poori file same hai matlab tumne copy ki hai”
Monika ko jaise ek jhatka sa laga. Usne ghoor kar Ravi ki taraf dekha to wo use muskurata huya najar aaya. Wo samajh gayi ki saari kartoot usi ki hai. Usne sir ko samjhane ki bahut koshish ki lekin sir uski baat maanne ke liye tayyar hi nahin the.
“Sir ho sakta hai Ravi ne meri file copy ki ho”
“Mujhe pata tha tum ye baat jaroor kahogi isliye maine dono packets par padi date aur time check kar liye the. Ravi ki file tumhari files se 4 ghante pehle ki bani hai. Iska matlab jab Ravi ne apni file studio mein de di tab tumne uski copy banwa li”
“Nahin sir ye jhoot hai”
“Shut up! Jhoot tum bol rahi ho. Ek to apni galti nahin maan rahi ho aur upar se jubaan lada rahi ho. Tum itni ochi harkat kar sakti ho ye maine nahin socha tha aur jao ab jaakar seat par baith jayo. You are removed from the list.”
Lekin Monika wahan ruki nahin aur roti huyi class se bahar chali gayi.
To be continued....
Saba
13-Jan-2022 08:57 PM
💖
Reply
Kareem
13-Jan-2022 08:22 PM
💖💖
Reply
Ayra S
23-Dec-2021 04:01 PM
🤞💙
Reply